尋貓記
1200 屋企
電話準時的於正午響起。矇矇朧朧的，左手在檯頭上拿起電話，頭卻仍埋在軟枕中。
我平時渴睡，但今次請別怪我，因為鳥兒才剛剛在大學站跟我道別。
「eiri唔見左呀！」
「大鑊」，我想。腦裏閃過跟eiri鬧著玩既情景。再閃過同老細開會你眼望我眼既情景。
1330 SHB117
到中大，我臨出門口前腥既相已經以彩色及黑白兩種姿態出現係一大疊尋貓啟示上。
列在尋貓狗秘笈裏的電話都打過了，能備案的地方都通知了，可以做的只剩底現場搜索。
1530 SHB1006門口
傾下講下又過到骨，不過之後重有樣更艱辛既野做──貼街招。
1615 大圍舊村學校（已荒廢）
幾經辛苦終於擒過左鐵絲網，條牛仔褲好似比d勾刮到，隻腳有d痛。好彩無勾爛到。
嘩，好大陣野貓野狗留底既氣味（主要係佢地既糞便）。頂，今日唔應該著對Paul Smith……
1715 大圍舊村
村裡面有咁多小路窄巷，樓與樓之間又咁近，隻貓周圍跳都得啦……
不過跟據秘笈講，貓走失後頭十小時既活動範圍只不過係一百米乘一百米，好在……
一個鐘內由幾十張貼剩派剩四張，都算高效率啦卦。
1745 田心警署對出
估唔到唔見左寵物都可以報失。警察叔叔仲話比我地聽法律上寵物只係property，報失只係方便認領，唔好旨意會有伙記去locate隻貓。我諗，你會叫人去搵我先驚。
PC叔叔仲話狗房不時都會捉到流浪貓狗，叫我地去睇下咁話喎。我即刻諗起黑社會・二同埋古天樂。
1800 新界南動物管理中心
終於有機會走一走顥徑對出的那段路，就是搭火車出九龍入山洞前的那一段。記憶中上一次走過既時候，連香港駕駛學院都仲未搬。
辦公時間已過，幸好還有職員接待我們。原來他們已經接到了貓貓走失的報告，然而今日捉回來的只是小貓兩三隻，重要係係青衣捉到既……
0235 賤橋
竟然能在五小時的工作（休息）後，以前所未有的速度直衝走正門，我都差啲跟唔上。
0300 私家車上
心想：「搵唔到eiri就慘啦。好可能以後都再見唔到。擔心……」
0301 私家車上
心想：「好走唔走，等dead report先黎玩離家出走，正衰貓！」
0317 大圍舊村
網友話深夜三點係全日之中最大機會找到失貓的時間。咁既時勢，點都要試下架啦。
為左搏eiri浪子回頭，出發前將貓沙同貓糧放左係門口。
兩條友拎住比Maglite弱十倍既電筒，走入潻黑無人既橫街小巷，你話如果忽然間照到啲曉郁既野，都幾得人驚。
0328 屋企門口
兜左十零分鐘，都唔見有eiri既踪影。再次經過屋企門口既小巷，去看一看貓糧及貓沙有無給貓兒弄過既跡象。
奇蹟一般既事情就係呢一刻發生！eiri安然地坐在貓糧旁，沒半點慌張，沒半點愁緒。
0420 屋企
歎住23度既冷空氣，一件新鮮出爐既麥記蘋果批既我，一邊打緊blog聽住古巨基既《愛與誠》，一邊警惕自己要珍惜眼前人和物。
廟街63號
自三歲開始就搬左入新界東，出出入入都不外乎屋企附近或者旺角尖咀銅鑼灣。同朋友出街玩唔會去，屋企人更加唔會帶我去，去廟街既機會基本上係零。由細到大，對廟街既印象大抵來自電視電影，《新不了情》、《廟街媽兄弟》個類啦，所以一直都覺得廟街係殘殘舊舊、污漕邋遢、龍蛇混雜、唔去好過去。 直至高中某一日．．．
補習係讀高中既潮流玩意。一個星期幾日放學流連到傍晚，再去灣仔排隊覇位。還記得當日冷鋒襲港，一班補岑蛇既朋友踏出學生會，又再次為食咩飯而煩惱。最深 刻既係李同學提議去廟街食煲仔飯，因為佢提議左之後話我一定會嫌污漕邋遢。哈，佢又講得岩喎，我聽到都有些少抗拒，但係抱住乜都試下同埋唔想比人標籤為潔 癖既心理下，一口應承左。就係咁，食左生平第一餐係廟街食既飯，亦都係生平最好食既煲仔飯。
相隔四年，重返舊地，感覺依然。
今晚同左覇王、傾士去美都餐室開餐。地點不難找，就係廟街街尾的一角。甫踏進門口，穿梭時光似的到了香港六七十年代，彷彿走進了九龍冰室。樓上雅座滿是座 上客，卻幸運地找到了窗邊卡位。霓虹燈線射進來，輕煙縷縷轉過來，一刻讓人忘掉自己在廿一世紀──不要誤會有人公然挑戰法紀，只是來自隔鄰廟宇的香火而 已。點了焗肉排飯配蓮子紅豆冰。老實說相對於這個價錢，質素只是一般，真難想像廟街食肆也要收取環境溢價。
飯後到廟街走走，心想陳同學總不會騙我吧。可能是下雨天的關係，攤鋪疏落得很，煲仔飯店那頭也只餘寥寥幾檔賣生果，要找的東西找不著，那條一千蚊卻找到了（嘻）！最後走進了沿途的「書店」逛逛，感受一下愛情x動作媒體的演變。畢竟我們也是隨著它們成長的。
期望三十年後，這裏不會變成九龍第N期重建項目中興建既超級無敵大商場。
板前
昨晚再食日本菜。
雖說我嗜日本菜但這一趟還是第一次到板前食壽司。之前對板前印象平平。絕對唔關無牌營業個單野事，那人龍及郁啲都百幾張枱、輪街症式既等位法先係真正令我卻步。
講番壽司，魚生尚算新鮮，但始終撇不下壽司飯太熱既垢病。不過平均十零廿蚊一碟，算係過得去。板前的感覺與我印象中多年前去峰壽司的感覺差不多：師傅群中一至兩位掛著日本姓名名牌，看起來很pro的壽司師傅；同樣地有超長鰻（宜家當然係變左做穴子啦．．．）及火炙。值得一讚既係十蚊有找既鰻魚手卷，食到落尾都仲有鰻魚既踪影。其實裏面既鰻魚份量未必比一般的多，但「有頭有尾」既滿足感並非隨處食到。
可能友人細食既關係，埋單比我想像中便宜。結論係可以再試。如果唔洗排隊既話。
下回預告：《300》
